Seljalandsfoss

Seljalandsfoss er einn þekktasti foss landsins og stendur við rætur Eyjafjallajökuls á Suðurlandi. Fossinn er um 62 metra hár og fellur úr Seljalandsá, sem á upptök sín á Seljalandsheiði.

Áin rennur um Tröllagil, sem tengist þjóðsögu um tröllkonu sem átti að hafa búið í Dimmakrók ofan við Ásólfsskála. Þegar kirkjuklukkur voru fyrst hringdar í byggðinni átti hún að hafa flutt búferlum inn í Tröllagil.

Neðan Tröllagils fellur áin niður gróðursæla Tröllagilsmýri þar sem hún myndar nokkra smærri fossa áður en hún steypist loks fram af hinum fornu sjávarhömrum sem liggja samsíða Suðurlandsströndinni.

Seljalandsfoss er sérstaklega þekktur fyrir það að hægt er að ganga bak við fossinn og upplifa hann úr óvenjulegu sjónarhorni. Gönguleiðin liggur í hellisskál sem myndast hefur á bak við vatnsfallið og býður upp á magnaða náttúruupplifun – sérstaklega í kvöldsólinni.

Í nágrenni fossins eru einnig aðrir áhugaverðir staðir á borð við Gljúfrabúa, Skógafoss og Seljavallalaug, sem gera svæðið að einum vinsælasta áfangastað Suðurlands.

Seljalandsfoss sést víða að þegar ekið er eftir Hringveginum og er einn mest ljósmyndaði foss Íslands, þekktur fyrir fallegt umhverfi, aðgengi og einstaka upplifun.