Bláa Lónið

Bláa lónið

Bláa lónið hóf að myndast árið 1976 þegar starfsemi Hitaveitu Suðurnesja í Svartsengi tók til starfa. Úrgangsvatn frá jarðvarmavinnslunni safnaðist saman í hrauninu og myndaði hið einstaka lón sem síðar varð heimsþekkt.

Nokkrum árum síðar fóru íbúar á svæðinu að baða sig í lóninu og fljótlega kom í ljós að vatnið hafði jákvæð áhrif á húð, sérstaklega á húðsjúkdóminn psoriasis. Þessi uppgötvun varð grunnurinn að skipulagðri starfsemi og árið 1994 tók Bláa Lónið hf. við rekstri svæðisins.

Í dag er Bláa lónið einn mest sótti ferðamannastaður Íslands, bæði meðal erlendra og innlendra gesta. Lónið er þekkt fyrir mjólkurbláan lit, ríkt steinefnainnihald og einstaka upplifun í umhverfi hrauns og gufu.

Bláa Lónið hf. rekur einnig sérhæfða meðferðaraðstöðu fyrir einstaklinga með psoriasis, þar sem jarðsjórinn og afleiddar meðferðir eru nýttar til að draga úr einkennum sjúkdómsins.

Bláa lónið er staðsett milli Reykjanesbæjar og Grindavíkur og er í aðeins um 20 mínútna akstursfjarlægð frá Keflavík og um 45 mínútur frá Reykjavík.

Frá Reykjavík er ekið í átt að Reykjanesbæ, beygt af á leiðinni til Grindavíkur og þaðan er aðeins um fimm mínútna akstur að aðkomu Bláa lónsins.