Miðja Íslands

Miðja Íslands

Miðja Íslands reyndist vera í landi Skagfirðinga, nánar tiltekið innan sveitarfélagsins Skagafjarðar. Staðurinn er staðsettur norðaustan við Hofsjökul, í um 800 metra hæð yfir sjávarmáli.

Það voru Landmælingar Íslands sem reiknuðu út hnit miðju landsins, að beiðni Ferðaklúbbsins 4x4, sem jafnframt stóð fyrir vígslu vörðunnar sem reist hefur verið á staðnum.

Útreikningurinn byggði á strandlínu Íslands úr aðalgagnagrunni Landmælinga Íslands. Eyjar landsins voru ekki teknar með í reikninginn. Niðurstaðan gaf eftirfarandi hnit: 64°59′11.4″ N og 18°35′12.0″ V.

Hugmyndin að merkja miðju Íslands kviknaði meðal félaga í Ferðaklúbbnum 4x4 nokkrum árum áður en framkvæmd hófst. Í kjölfarið var farið í leiðangur á svæðið til að staðfesta staðsetninguna og reist var lítil varða sem fyrsta merki.

Síðar var ákveðið að setja þar stærri og varanlegri stein. Valinn var stuðlabergssteinn frá Hrunamannahreppi. Flutningur hans reyndist erfiður og gekk með miklum tilþrifum, en steinninn stendur nú sem táknræn merking á miðju Íslands.