Hellnar

Hellnar er gamalt sjávarþorp á Snæfellsnesi, vestan við Arnarstapa. Þar var áður ein stærsta verstöð á nesinu, auk þess sem þar voru nokkur grasbýli og margar þurrabúðir. Talið er að verstöð hafi myndast á Hellnum þegar á miðöldum og elsta ritaða heimild um sjósókn þaðan er frá árinu 1560.

Á 17. öld var á Hellnum allstór byggð sjóbýla og samkvæmt manntalinu frá 1703 bjuggu þar 194 manns. Þá voru á staðnum sjö grasbýli, ellefu ítaksbýli og tuttugu þurrabúðir, sem sýnir hversu mikilvæg Hellnar voru sem útgerðar- og búsetustaður.

Ströndin við Hellna einkennist af fallegum og sérkennilegum bergmyndunum. Þar skagar bjarg út í sjóinn sem nefnist Valasnös, og í því er hellirinn Baðstofa. Litbrigði í hellinum eru mjög breytileg og ráðast af birtu og sjávarföllum.

Undan hraunjaðrinum sprettur lind sem kölluð er Gvendarbrunnur eða Maríulind. Þar er einnig Ásgrímsbrunnur, kenndur við Ásgrím Hellnaprest (1758–1829), sem hjó brunn í bergið þar sem áður hafði ekki runnið vatn.

Hellnar eru skammt frá Snæfellsjökulsþjóðgarði og þar er staðsett upplýsingamiðstöð um þjóðgarðinn. Á Hellnum er einnig svæði með frístundahúsum sem nefnist Plássið undir Jökli, en framkvæmdir þar hafa legið niðri um tíma.

Mynd: Anton Stefánsson