Vatnshellir

Vatnshellir er hraunhellir í Purkhólahrauni, sem er talið eitt hellaauðugasta hraun landsins. Hraunið er basískt helluhraun og er talið vera um 5–8 þúsund ára gamalt.

Vatnshellir er hluti af stærra hellakerfi sem samanstendur af fjórum hellum. Sá efsti er hinn eiginlegi Vatnshellir og er hann aðgengilegur almenningi. Neðar í kerfinu eru hellarnir Bárðarstofa og Vættagangur, og neðst er hellirinn Iður. Saman ganga þessir neðri hlutar undir heitinu Undirheimar.

Heildarlengd neðri hluta Vatnshellis er um 200 metrar og lofthæð er víðast hvar allt að 10 metrar. Dýpsti hluti hellisins, Iður, er meira en 30 metrum undir yfirborði jarðar. Í lofti hellisins, einkum í Vættagangi, má sjá hvítleitan og glitrandi bakteríu- eða sveppagróður sem endurkastar ljósi og skapar sérstakt andrúmsloft.

Nafn sitt dregur Vatnshellir af því að áður fyrr var vatn sótt í hellinn og kýr frá Malarrifi voru brynntar þar á þurrkatímum.

Vatnshellir er staðsettur í suðurhlíðum Purkhólahrauns, ofan við Malarrif og skammt frá Útnesvegi. Bílastæði er við aðalvegi og hellirinn er vinsæll áfangastaður fyrir þá sem vilja kynnast hraunhellum og jarðfræði Snæfellsness.

Mynd: Anton Stefánsson