Djúpihellir

Djúpihellir er hraunhellir í Strompahrauni, þar sem finna má fjölda hraunhella af ýmsum stærðum. Hellirinn er um 260 metra langur og telst fremur sérstakur vegna þess hversu víður hann er og hár til lofts í upphafi.

Í lofti hellisins eru að minnsta kosti tvö stór op, um 15 metrum ofan við hellisgólfið. Hellirinn er einnig óvenjulegur að því leyti að hann liggur að hluta til á nokkrum hæðum. Innan í honum er lélegur stigi sem hægt er að nota til að komast upp á efri hæðir hellisins.

Innar í hellinum hafa verið festir kaðlar fyrir þá sem vilja klifra hærra upp og halda áfram að skoða hellinn. Ef farið er alla leið inn í Djúpahelli þarf að skríða eða príla í gegnum þrönga holu.

Aðkoma að hellinum er tiltölulega einföld. Þegar komið er að aðalsvæðinu við Bláfjöll er best að aka gamla veginn sem liggur hinum megin við stóra bílastæðið. Ef horft er til hæðarinnar neðan við veginn má sjá skilti standa þar uppi og er hellirinn staðsettur í nágrenninu. Mikið er um hraunhella á þessu svæði.

Mynd: Anton Stefánsson