Dalvík er kaupstaður sem stendur við samnefnda vík við mynni Svarfaðardals, um 40 km norðan Akureyrar en þar búa um 1500 manns. Sjávarútvegur, fiskvinnsla og aðrar atvinnugreinar sem tengjast sjávarútvegi skipa stóran sess á Dalvík en aðrar atvinnugreinar líkt og ferðaþjónusta, iðnfyrirtæki og matvælaiðnaður skapa hér fjölda fólks atvinnu. Að sama skapi er á Dalvík mikil þjónusta og verslun sem fólk hefur atvinnu af.

Á Dalvík er stór fiski- og vöruhöfn og þaðan siglir Grímseyjarferjan Sæfari milli lands og eyja. Segja má að Dalvík sé miðstöð verslunar og þjónustu í sveitarfélaginu og þar er töluvert framboð miðað við stærð sveitarfélagsins. Skíðasvæði Dalvíkurbyggðar er rétt við bæjarmörk Dalvíkur og á Dalvík má einnig finna góða sundlaug, bóka- og héraðsskjalasafn og byggðasafn.

Dalvíkurbyggð er sveitarfélag, staðsett við utanverðan Eyjafjörð að vestanverðu. Sveitarfélagið skiptist upp í byggðakjarnana Dalvík, Árskógssand og Hauganes og búsetukosti í sveitunum, þ.e. á Árskógsströnd og í Svarfaðardal. Vegalengdir eru litlar innan sveitarfélagsins og þess vegna er auðvelt að búa á Hauganesi, vera með hesta í Hringsholti í Svarfaðardal, stærsta hesthúsi landsins, og vinna á Dalvík, í Ólafsfirði, á Akureyri eða hvar sem er. Samgöngur eru góðar, bæði innan sveitarfélagsins sem og við aðra þéttbýliskjarna, sumar og vetur, og aðeins tekur 35 mínútur að keyra til Akureyrar.