Vopnafjörður er allbreiður flói milli Bakkflóa og Héraðsflóa. Fyrir miðjum firði er tangi, Kolbeinstangi, þar sem Vopnafjarðarkauptún stendur. Norðan Kolbeinstanga er innfjörðurinn Nýpsfjörður og inn af honum Nýpslón.
Mikill fjallgarður rís handan fjarðarins frá Tanganum séð. Krossavíkurfjöll eru þar mest áberandi en syðst rísa Smjörfjöll sem eru hæstu fjöll fjarðarins. Inn af Vopnafirði ganga þrír megindalir og mikið undirlendi. Hofsárdalur er syðstur, næstur er Vesturárdalur og Selárdalur nyrstur. Um dalina renna rómaðar laxveiðiár.

Um Vopnafjörð liggja víða gönguleiðir, margar merktar. Flestir ættu að finna eitthvað við sitt hæfi, hvort sem er krefjandi fjallgöngu, ævintýralega tjaldferð, daglanga náttúruskoðun eða friðsæla kvöldgöngu. Golfvöllur Vopnafjarðar er 9 holu völlur rétt innan þéttbýlisins í landi Skála.

Strandlengja Vopnafjarðar er áhugaverð þar sem hólmar, sjávarbjörg, drangar og sérkennilegar klettamyndanir eru einkennandi. Innst í firðinum er mikil sandströnd, Sandvík.

Flatarmál: 1913,48 km2
Íbúafjöldi (1. desember 2009): 682
Íbúar á ferkílómetra: 0,36